王貽興專欄：商場求婚的重點

也許同樣惡俗的事，由富二代做，跟毒L做，效果就是不一樣，如果某富二代老豆無錢，大概就不會再有多少港女讚他Package好或者眼睛靚，我就打死唔覺，上述求婚大龍鳳，同毒L響Function向女神當眾示愛有什麼分別，講到尾除咗樣既問題，就係家底既問題囉……

你的求婚方式如何，你的品味水平也必如何，你響紐約時代廣場或者巴黎香麗榭大道拿著一束鮮花跪地求婚，這是荷里活浪漫電影的情節，但你在內地商場搵埋一班騎呢老臨伴舞，自己換衫唱謝霆鋒，再拿著白油塗的名牌禮盒跪地獻婚戒，就真的老土兼核突，比起內地山寨Ironman電影機甲戰神孫悟空更加不如，衰啲講句，幾十年前晶哥《精裝追女仔2》老周電視台直播劉華媾返李美鳳都仲貼地得意過你，如果唔係畀面你老豆啲錢，條女分分鐘早就一腳伸開你啦……

暴發戶發財固然立不了品，暴發戶的子女其實也不一定能在較有品味的環境下培養成長，有錢買不了好品味，更遑論擇偶品味，講真，好品味同好家底，我諗大把人空有好品味，但得個睇字根本冇錢買，只能揭雜誌欣賞，最後都寧願揀好家底，我唔識欣賞又點，將人類藝術史上珍品當煙灰缸當枱腳墊又點，至少我日日摸到用到見到，你有咩？

不過結婚即使不求門當戶對，都但求好惡一致。幸虧富二代娶的是內地女子，對於這種土豪方式當然對味之至，你拉她到巴黎到天空之鏡赤足求婚，她還嫌怎麼沒有群眾演員沒有99999支玫瑰沒有鞭炮沒有名牌沒有拍抖音呢。