王貽興專欄：放過阿嬌

套用她的邏輯或者句式，其實可以演繹為「個個都結婚，唔通個個都想結婚咩」——又真喎，幾多人結婚係為結而結，因為拖咗太耐，剩飲雙計，唔埋單唔得掂，又或者時候到咗，咁啱身邊係呢一個，問心就唔係好理想，但搵過第個又怕麻煩又嘥時間，最重要係風險都唔細，自己年紀更加唔細，咁咪結囉……
反正大家都一樣架啦，人做咩你做咩，咁個個結婚都擺酒，唔通個個結婚擺酒都真係想擺酒咩？都係做畀人睇，應付世人啫。

所以嘛，「個個都生仔，唔通個個都想生仔咩」，咪又同一道理？過多幾年生就越難生，風險越嚟越大，反正最後都要生，咪早啲生囉，唔通唔生咩，但係咪真係已經Ready做人父母，係咪真係咁想要小朋友，大家心照啦……

對對情侶都嗌交，唔通對對情侶都想嗌交咩；對對情侶都上床，唔通對對情侶都咁想上床咩，好多時候都係應酬交功課，唔做對方就會問點解，問你係咪已經唔愛我，問你出面係咪有咗第二個，咁咪做囉，唔做仲煩，唔想做都要做架啦，咁情侶係要做架嘛……

身不由己，口不對心，身心相違，阿嬌一句，道盡都巿男女無法宣之於口的悲哀無奈，可謂一語中的，命中紅心，然而從她口中說出來，始終有點教人惻隱憐惜的意味，畢竟我們看著她一路走來，看著她跌跌碰碰，天真過，受傷過，信任然後被背叛，那一句話，就更顯沉重無語。

個個都問阿嬌做咩唔拍拖，唔通佢真係都想唔拍拖梳起一世咩。放過佢，唔好再對佢咁harsh啦。係咪想要迫到佢變成藍潔瑛大家先至肯收手呀？